ಭೀಮನಗರದ ದೊಡ್ಡ ಯಜಮಾನರು ಮತ್ತು ಅಂಬೇಡ್ಕರ್ ಸಂಘದ ಅಧ್ಯಕ್ಷರ ಪತ್ರಿಕಾ ಹೇಳಿಕೆಗೆ ಮನ್ನಣೆ ನೀಡದ ಮುಖಂಡರು : ಅಂಬೇಡ್ಕರ್ ಭವನ ಉದ್ಘಾಟನೆ ಮುಂದೂಡಿಕೆ

ಕೊಳ್ಳೇಗಾಲ: ಅಪೂರ್ಣ ಗೊಂಡಿರುವ ಡಾ.ಬಿ.ಆರ್. ಅಂಬೇಡ್ಕರ್ ಭವನವನ್ನು ಇದೇ ತಿಂಗಳು 29 ರಂದು ಉದ್ಘಾಟನೆ ಮಾಡುವುದಾಗಿ ಪತ್ರಿಕಾ ಗೋಷ್ಠಿಯಲ್ಲಿ ಹೇಳಿಕೆ ನೀಡಿದ್ದ ಭೀಮನಗರ ದೊಡ್ಡ ಯಜಮಾನ ಮತ್ತು ಅಂಬೇಡ್ಕರ್ ಸಂಘದ ಅಧ್ಯಕ್ಷರ ಹೇಳಿಕೆಯನ್ನು ಭೀಮನಗರದ ಮುಖಂಡರು ಒಮ್ಮತದಿಂದ ವಿರೋಧಿಸಿದ್ದು, ಬಹುತೇಕ ಮುಖಂಡರ ಅಭಿಪ್ರಾಯವನ್ನು ಸ್ವೀಕರಿಸಿ ಭವನದ ಉದ್ಘಾಟನೆ ದಿನಾಂಕವನ್ನು ಮುಂದೂಡಲಾಯಿತು.

ಭೀಮನಗರದ ಬಸವನಗುಡಿ ದೇವಸ್ಥಾನದಲ್ಲಿ ಶನಿವಾರ ಭೀಮನಗರ ಕುಲಸ್ಥರು, ಯಜಮಾನರು, ಮತ್ತು ಅಂಬೇಡ್ಕರ್ ಸಂಘದ ಪದಾಧಿಕಾರಿಗಳ ಸಮಕ್ಷಮ ಸಭೆ ಕರೆಯಲಾಗಿತ್ತು.

ಈ ವೇಳೆ ಭೀಮನಗರದ ಯಜಮಾನರು ಮುಖಂಡರ ಅಭಿಪ್ರಾಯಗಳನ್ನು ಕೇಳಿದರು. ಆಗ ಬಹುತೇಕ ಮುಖಂಡರು ತಮ್ಮ ಅಭಿಪ್ರಾಯವನ್ನು ಸಭೆಯಲ್ಲಿ ಹೇಳಿ, ಭವನ ಕಾಮಗಾರಿ ಅಪೂರ್ಣ ಗೊಂಡಿರುವುದರಿಂದ ಯಾವುದೇ ಕಾರಣಕ್ಕೂ ನವೆಂಬರ್ 29 ರಂದು ಉದ್ಘಾಟನೆ ಬೇಡ, ಸಂಪೂರ್ಣ ಕಾಮಗಾರಿ ಆದ ನಂತರವೇ ಉದ್ಘಾಟನೆ ಮಾಡುವುದು ಸೂಕ್ತ ಎಂದರು.

ಅಲ್ಲದೆ, ಹಿಂದಿನಿಂದಲೂ ಭೀಮನಗರದಲ್ಲಿ ಯಾವುದೇ ನಿರ್ಣಯ ತೆಗೆದು ಕೊಂಡರು.. ಬಸವನಗುಡಿಯಲ್ಲಿ ಸಭೆ ಸೇರಿ ಕುಲಸ್ಥರು ಒಮ್ಮತದಿಂದ ನಿರ್ಧಾರ ತೆಗೆದು ಕೊಳ್ಳುತ್ತಿದ್ದರು, ಮುಂದೆಯೂ ಇದೇ ಪರಂಪರೆ ನಡೆಯಬೇಕು. ಬೇರೆ ಸ್ಥಳಗಳಲ್ಲಿ ಕುಳಿತು ಭೀಮನಗರದ ವಿಚಾರಗಳ ಬಗ್ಗೆ ನಿರ್ಧಾರ ತೆಗೆದು ಕೊಳ್ಳಬಾರದು ಎಂದು ಸಭೆಗೆ ತಿಳಿಸಿದರು.

ಸಭೆಯಲ್ಲಿ ಓರ್ವ ಮುಖಂಡ ಮಾತನಾಡಿ, ನಮ್ಮ ಯಜಮಾನರು ಮತ್ತು ಕುಲದ ಗಮನಕ್ಕೆ ತರದೆ ಅಂಬೇಡ್ಕರ್ ಭವನ ಉದ್ಘಾಟನೆ ದಿನಾಂಕ ನಿಗದಿ ಮಾಡಲಾಗಿದೆ ಎಂದರು. ಈ ಮಾತಿಗೆ ಸಭೆಯಲ್ಲಿ ಆಕ್ಷೇಪ ವ್ಯಕ್ತವಾಯಿತು. ಭೀಮನಗರದ ದೊಡ್ಡ ಯಜಮಾನರೇ, ಪತ್ರಿಕಾ ಗೋಷ್ಠಿಯಲ್ಲಿ ಹಾಜರಿದ್ದು ಹೇಳಿಕೆ ನೀಡಿದ್ದಾರೆ ಎಂಬ ಬಗ್ಗೆಯೂ ಸಭೆಯಲ್ಲಿ ಪ್ರಸ್ತಾಪ ಆಯಿತು.

ಅಂತಿಮವಾಗಿ ಭೀಮನಗರದ ಯಜಮಾನರು ಅಂಬೇಡ್ಕರ್ ಭವನ ಉದ್ಘಾಟನೆ 29 ರಂದು ನಡೆಯಬೇಕಿದ್ದ ಕಾರ್ಯಕ್ರಮ ಮುಂದೂಡುವ ನಿರ್ಧಾರ ತೆಗೆದು ಕೊಂಡರು. ಇದರಿಂದ ಒಂದು ಹಂತದಲ್ಲಿ ನಿರಾಶೆ ಒಳಗಾದ ಅಂಬೇಡ್ಕರ್ ಸ್ಮಾರಕ ಸಂಘದ ಅಧ್ಯಕ್ಷರು ತಮ್ಮ ಸ್ಥಾನಕ್ಕೆ ರಾಜಿನಾಮೆ ನೀಡುವ ಬಗ್ಗೆ ಸಭೆಯಲ್ಲಿ ತಿಳಿಸಿದರು. ನಂತರದಲ್ಲಿ ಮುಖಂಡರು ಅವರನ್ನು ಸಮಾಧಾನ ಮಾಡಿದರು ಎಂದು ತಿಳಿದು ಬಂದಿದೆ

ವರದಿ: ನಿಂಪು ಬ್ರದರ್ಸ್